أنظمة برمجية عراقية —
مبنية على شغلك، مو مترجمة عليه
نبني أنظمة إدارة للسوق العراقي: مكاتب الصيرفة، مكاتب الجملة، النوادي الرياضية، محلات الملابس، الموارد البشرية والرواتب، ومبيعات البث المباشر. عربي بالكامل، على الكومبيوتر والموبايل، وبعضها يشتغل بلا إنترنت ويزامن لما يرجع الاتصال.
شنو بنينا لحد اليوم
كل نظام منهن مبني لقطاع محدد — مو قالب عام مصبوغ باسم جديد. تكدر تدخل تشوفه بنفسك.
دفتر المكتب يشتغل بروحه: بيع وشراء العملات، الصندوق بتفصيل الفئات، والجواب الفوري على «شكد مركزي؟» و«شكد ربحت فعلاً؟».
- الجرد الأعمى
- الخزنة والتعزيز
- محفظة كي كارد
- سجل تدقيق لا يُمحى
- يشتغل بلا إنترنت
الاستلام والمخزن والبيع بمكان واحد. تسحّب الباركود بكاميرا الموبايل، وتدخّل الكميات بصوتك بدل ما تكتب.
- باركود بالكاميرا
- إدخال بالصوت
- كل الكميات بالقطع
- متعدد المكاتب
من مركز الجملة للفرع للمندوب بالسيارة — الطلب والكلفة والتحصيل بخيط واحد. والمحل الصغير يبدي بالأساسيات ويكبر شركة كاملة لمن يحتاج.
- مندوب ڤان ومندوب طلبات
- حضور بكود وموقع
- دردشة الفريق
- كتالوج مركزي
- موقع + تطبيق
اشتراكات ومتدربين وحضور ومدربين — بلوحة لصاحب النادي وتطبيق موبايل للمتدرب والكابتن، ويدير أكثر من قاعة بحساب واحد.
- الاشتراكات والتجديد
- الحضور
- تطبيق المتدرب
- متعدد الفروع
سوق واحد يجمع محلات الملابس — الزبون يدخل يشوف كل المحلات، وكل صاحب محل سيّد خصوماته وشكل متجره: تختار الستايل ونلبسه شعارك.
- متجر لكل محل
- ستايلات جاهزة
- خصومات بإيد المحل
- موقع + تطبيق
صاحب البث يعرض البضاعة، والزبون يحجز بكتابة كلمة وحدة بالتعليقات — والطلب يتسجّل ويوصل لباب البيت بلا لخبطة.
- حجز بكلمة وحدة
- طلبات مباشرة من البث
- توصيل
برنامج ويندوز يشتغل بالمكتب بلا إنترنت: العقارات والزبائن والعقود، ويطبع عقد البيع أو الإيجار على نفس الاستمارة الرسمية مو على ورقة فارغة.
- طباعة على الاستمارة
- المبلغ بالحروف
- يشتغل بلا إنترنت
- بيانات مشفّرة ومربوطة بالجهاز
محرك رواتب يطلع نفس أرقام إكسلكم رقم-برقم (ضمان، وعاء، ضريبة)، تايم شيت بنمط ورقتكم، وتقرير وملف بنك لكل جهة ممولة — مع بوابة موظف بالموبايل.
- رواتب وتخصيص لكل مانح
- تايم شيت
- بوابة الموظف
- ثلاثي اللغة
الفرق مو بالمزايا — بالفهم
أغلب الأنظمة الجاهزة مترجمة من برّه، فتضطر تغيّر شغلك حتى يناسب البرنامج. احنا نعكسها.
عربي عراقي، مو ترجمة
الشاشة تحچي بلغة السوق: «الجرد الأعمى»، «التعزيز»، «الوصل». الموظف يفتحها ويفهمها بلا تدريب طويل.
يحسب حساب الكهرباء والنت
نبني للواقع: نظام يشتغل على جهاز المكتب بلا إنترنت ويزامن لما يرجع الاتصال، مو نظام يوقف لأن النت طفّى.
ماكو حذف — بس قيد عكسي
كل عملية مسجلة باسم صاحبها ووقتها، والإلغاء يصير بقيد معاكس. حتى تعرف منو سوّا شنو، ومتى.
لوحة بالمكتب وشاشة بجيبك
النظام على الكومبيوتر، وتطبيق موبايل للمالك والموظف. تشوف شغلك وانت برّه المكتب.
من الحچي للنظام الشغّال
نكعد وياك ونفهم شغلك
مو نسألك «شنو تريد بالنظام» — نسألك كيف تشتغل اليوم، ووين تتعب، وشنو الورقة الي تكرهها.
نبني النواة أول
أهم شاشة بشغلك تنبني وتشتغل حقيقي — مو رسم ولا موك أب. تجرّبها بنفسك قبل ما نكمّل.
ننشره ونشغّلك عليه
ينزل على سيرفر ويشتغل بدومينك، وندرّب فريقك، وننقل بياناتك القديمة إذا موجودة.
نبقى وياك
النظام يكبر وياك: مزايا جديدة، تقارير جديدة، فروع جديدة. مو نسلّمك ملف ونختفي.
قطاعات اشتغلنا بيها
وإذا قطاعك مو بالقائمة — هذا مو مانع. أغلب أنظمتنا بدت من صاحب شغل كالنا «ماكو شي يناسبني».
عندك شغل تريد ينتظّم؟
احچيلنا شنو تشتغل ووين تتعب — ونكلك بصراحة إذا عدنا شي يناسبك، أو إذا لازم ينبنى من الصفر، أو إذا ما تحتاج نظام أصلاً.